ChatGPT

ChatGPT d amallal n udiwenni s tigzi taragmawant (AI) i d-tesnulfa taṛmist OpenAI. Yeffeɣ-d i useqdec azayez deg 30 Wamber 2022, deg tazwara am rusenfaṛ n unadi, iwakken OpenAI ad telmed seg useqdec n yimdanen, ad tissin tizemmar d tilisa n unagraw-is. Deg lqem-is amezwaru, ChatGPT yebna ɣef umudam seg twacult GPT-3.5.

Isem ChatGPT yebḍa ɣef sin yiḥricen: Chat, anamek-is adiwenni, akked GPT — Generative Pre-trained Transformer, tawacult n yimudam n tutlayt i ɣef yebna. Tamiḍrant tagejdant d ad yerr tazmert n yimudam imeqqranen n tutlayt deg ugrudem anda amdan yezmer ad yesseqdec tigzi taragmawant s tutlayt tagamant, amzun yettmeslay akked umeggay.

Ass-a, ChatGPT yugar aṭas tamiḍrant n chatbot. Yezmer ad iɛiwen deg tira, tussna, anadi, asihel, tasleḍt n yisefka d yisemliyen, tugniwin, tifrat n wuguren, aseggem n yisenfaren d waṭas n twuriwin-nniḍen. OpenAI tessegza-t am umallal AI i izemren ad iɛiwen deg twuriwin n yal ass.

1. Talalit n ChatGPT

Mi d-yeffeɣ ChatGPT deg 2022, tamiḍrant n umeslay akked tmacint ur telli ara d tamaynut. Llan chatbots uqbel-is s waṭas n yiseggasen. Ayen i ibeddlen akked ChatGPT d tazmert n umudam-is ad yegzu asiḍen n udiwenni, ad ikemmel ameslay ɣef waṭas n yisteqsiyen, ad yessegzi timiḍranin, ad yaru iḍrisen ɣezzifen, yerna ad ixdem tiwuriwin yemgaraden war ma ilaq ad yettwaselmed s talɣa tusridt i yal yiwet seg-sent.

OpenAI tessegza deg ussufeɣ n 2022 belli talɣa n udiwenni tettak i ChatGPT tazmert ad d-yerr ɣef yisteqsiyen i d-iteddun deffir yisteqsi amezwaru, ad iqbel mi yecceḍ, ad yesseɣti kra n turdiwin ur nṣeḥḥa ara deg usteqsi, yerna ad yagi kra n yisutar ur nemṣada ara akked tɣellist.

Lqem amezwaru yettwaselmed s tarrayt n RLHF — Reinforcement Learning from Human Feedback, anda imdanen ɛawnen deg uselmed n unagraw s usmenyif gar tririyin yemgaraden. ChatGPT n tazwara yebna ɣef GPT-3.5, maca deg yiseggasen i d-yeḍfernen OpenAI ternu imudam s tzemmar ugar.

2. D acu i d GPT?

Iwakken ad nefhem ChatGPT, ilaq ad nefhem GPT.

GPT d agzul n Aselkat n usaraw uzarsileɣ(Generative Pre-trained Transformer).

Asaraw yemmal-d belli amudam yezmer ad d-isnulfu agbur am uḍris, tangalt n useɣẓan neɣ igemmaḍ-nniḍen.

Azarsileɣ yemmal-d belli uqbel ad yebdu udiwenni akked useqdac, amudam yettwaselmad yakan ɣef yisefka imeqqranen.

Aselkat d anaw n taneɣruft n uẓeṭṭa n uselmed alaway i yerran imudam n tutlayt imeqqranen n tura zemren ad xedmen tasleḍt n wassaɣen gar wawalen, tefyar d yimektayen deg yiḍrisen.

ChatGPT, ihi, mačči d adlis ameqqran anda tella tririt i yal asteqsi. D anagraw n uselmed n tmacint i yesseqdacen imudam i yettwaselmaden ɣef waṭas n yisefka, syin yesseqdac ayen yelmed iwakken ad d-isuddes tiririt almend n usteqsi d usatal.

3. Amek iteddu ChatGPT?

Mi ara taruḍ asteqsi, aḍris-ik yettwabḍa ɣer iferdisen imeẓyanen i nezmer ad nessemmi tiddas(tokens). Tiddest tezmer ad yili awal, aḥric n wawal, azamul neɣ kra n usekkil almend n tutlayt d umsiddes(tokenizer) i yettwaseqdacen.

Amudam yettawi tiddest-a, yettales tasleḍt n wassaɣen gar-asen akked usatal i d-yezwaren, syin yettak tilisa i wayen i izemren ad d-iḍfer. S talɣa taḥerfit, yezmer ad yettwafhem am unagraw i yettaznen yal tikkelt: «D acu i ilaqen ad d-iḍfer tura?»

Maca mi ara nales ayagi ɣef yimelyunen neɣ yimelyaren n yiferdisen d yassaɣen ussnanen i yelmed umudam, ad d-teffeɣ tazmert i yugar s waṭas asnimer n wawal i d-iteddun: asegzi, tira, agdal, tasleḍt, asihel, tifrat n wuguren d usuddes n tamusni.

Dɣa, ma tella tririt tettban amzun tamacint «tessen» ayen i d-tenna, ilaq ad nefrez gar tarrayt n umudam d tegzi n umdan. ChatGPT d anagraw n tigzi taragmawant; ur ilaq ara ad as-nefk iḥulfan, iman neɣ tamuɣli tudmawant n umaḍal war ad yili ufus ussnan i waya.

4. Aselmed s tallelt n yimdanen

Yiwen seg yiferdisen i d-yerran ChatGPT yemgarad ɣef kra n yimudam iqburen d aselmed iwakken ad iḍfer tanaḍt n useqdac yerna ad yerr s talɣa iwulmen i udiwenni.

Deg lqem amezwaru, OpenAI tessemres supervised fine-tuning: imselmaden imdanen ttaken-d imedyaten n yidiwenniyen gar useqdac d umeggay. Syin, OpenAI tessemres RLHF. Imdanen smenyafen gar waṭas n tririyin; isefka-a ttwasqedcen iwakken ad yelmed unagraw anwa anaw n tririt i d-yettwasmenyafen.

Tarrayin n uselmed n yimudam imaynuten n tura zemrent ad mgaradent ɣef tarrayt-a tamezwarut, maca tamuɣli tagejdant teqqim: ur ilaq ara umudam ad yissin kan amek ara d-isnulfu aḍris; ilaq daɣen ad yelmed amek ara iḍfer tanaḍt d wamek ara d-yerr s talɣa ara yilin d abaɣur i useqdac.

5. Seg GPT-3.5 ɣer yimudam imaynuten

Amezruy n ChatGPT yeqqen ɣer unerni n yimudam n OpenAI.

Deg 2022, ChatGPT amezwaru yebna ɣef GPT-3.5. Deg Meɣres 2023, GPT-4 yekcem ɣer ChatGPT Plus. Deg Mayyu 2024, GPT-4o yekcem ɣer ChatGPT. Deg Sebtember 2024, OpenAI tebda tessemras imudam n uwemmam/reasoning s o1-preview d o1-mini. Deg Ɣuct 2025, GPT-5 yekcem ɣer ChatGPT.

Deg 2026, tawacult GPT-5.6 tettwaseqdec deg ChatGPT. OpenAI tessegza GPT-5.6 Sol am umudam i yesseqdacen Plus d Pro i twuriwin i yeḥwaǧǧen tizemmar ugar, ma d GPT-5.6 Luna d amudam agejdan i yiseqdacen Free d Go deg ubeddel i d-tessegza deg Ɣuct 2026.

Anamek-is d akken ChatGPT mačči d yiwen n umudam. D afaris neɣ d agrudem i izemren ad yesseqdec imudam yemgaraden almend n lqem, n twuri d unaw n umiḍan.

6. Adiwenni d usatal

Tazmert tagejdant n ChatGPT d asatal n udiwenni.

Ma testeqsaḍ, syin terniḍ: «Segzi-d ugar», ChatGPT yezmer ad yegzu belli tmeslayeḍ ɣef tririt yezrin. Ur ilaq ara ad talseḍ asteqsi seg tazwara.

Anect-a yettili acku iznan n udiwenni zemren ad ilin deg usatal i yettwafkan i umudam. S waya, adiwenni yezmer ad yuɣal d axeddim s kra n yimeḍqan: asteqsi → tiririt → aseɣti → tasleḍt → lqem aneggaru.

D ayen i d-yefkan azal ameqqran i ChatGPT am wallal n uselmed, tira, asihel d unadi.

7. Tifrat n wuguren d «uxemmam»

Imudam imaynuten n ChatGPT ur ttwasqedcen ara kan i tira n tutlayt; zemren daɣen ad xedmen ɣef tifrat n wuguren.

Deg leḥsab, asihel, tussna neɣ tasleḍt, anagraw yezmer ad yesseqdec tarrayin i as-yettaken akud ugar i usuddes n tririt uqbel ad tt-id-yefk.

Anect-a ur ilaq ara ad yettwafhem amzun ChatGPT yettxemmim s yiḥulfan neɣ s teɣzi n umdan. Awal axemmam neɣ s teglizit reasoning dagi yettuseqdac i tzemmar n unagraw ad yesseqdec kra n yimenzayen d tarrayin n tifrat n wuguren iwakken ad yawi ɣer ugemmuḍ igerrzen.

Deg 2026, OpenAI tettak deg kra n yimudam-is tarrayin i yettaǧǧan aseqdac ad yefren acḥal n wakud d tzemmar ara yefk unagraw i tifrat n wugur.

8. Agetaskarant — multimodality

ChatGPT n tura ur yettqimi ara deg uḍris kan.

Imudam d wallalen-is zemren, almend n lqem d umiḍan, ad xedmen akked tugniwin, ifuyla d yisemliyen, ad ten-sleḍ, ad ten-id-ssegzin neɣ ad d-rren ɣef yisteqsiyen fell-asen. OpenAI tessegza ChatGPT am umeggay i yezmer ad yettwaseqdec i tesleḍt n tugniwin d yifuyla, rnu ɣer tira, asiḍen(leḥsab), asihel d usuddes n yimektayen.

Tazmert-a tettusemma s Teglizit multimodality: anagraw ur yettqabal ara yiwen n wanaw n yisefka kan.

Anect-a yessekcem ChatGPT seg umaḍal n chatbot n uḍris ɣer unagraw wessiɛen i izemren ad ixdem akked waṭas n wanawen n yisefka.

9. Anadi deg Web

Yiwen seg wuguren n yimudam n tutlayt d akken tamusni i d-yettwaselmed ur tezmir ara ad tili d tamaynut i lebda. Tella talast gar wakud n uselmed d wayen iḍerrun tura deg umaḍal.

I tifrat n waya, ChatGPT yezmer ad yesseqdec anadi deg Web. Deg umḍiq n wakken ad d-yerr kan seg tamusni n umudam, yezmer ad inadi ɣef yisallen imaynuten deg Internet, ad ten-yesleḍ, syin ad d-yefk tiririt s tuɣalin ɣer yɣbula. OpenAI tessegza belli ChatGPT Search yettaǧǧa ChatGPT ad d-yawi isallen imaynuten seg Internet srid ɣer udiwenni.

Aya yesɛa azal deg yisental i yettbeddilen s lemɣawla: isallen n wass, tetiknulujit, ibeddilen n yifarisen, tasertit, tadamsa, imeslayen ussnanen imaynuten d wayen-nniḍen.

10. Anadi Lqayen

I unadi yeḥwaǧǧen ugar n telqayt, OpenAI tesnulfa Deep Research.

Deg umḍiq n unadi aḥerfi i d-yettawin kra n yɣbula, Anadi Lqayen(Deep Research) yezmer ad yebnu abrid n unadi, ad inadi deg waṭas n yɣbula, ad ten-yesmenyaf, ad yessemlil isallen, syin ad d-isuffeɣ aneqqis neɣ tasleḍt s yɣbula.

Deg 2026, OpenAI terni tazmert i Deep Research ad yeqqen ɣer yisnasen d yiɣbula-nniḍen, yerna aseqdac yezmer ad iwali amek iteddu unadi yerna ad t-id-ibeddel deg tazwara ar taggara.

S waya, ChatGPT yezmer ad yuɣal seg umeggay n yisteqsiyen d tririyin ɣer umallal n unadi.

11. Takatut — ccfawat n ChatGPT

Yiwen seg yibeddilen imeqqranen deg ChatGPT d takatut/Memory.

Deg udiwenni aḥerfi, ChatGPT yezmer ad yeḥrez asatal n wayen i d-nnan yiseqdacen deg udiwenni-nni. Memory, tezmer ad tessekcem kra n usatal i wakud ɣezzifen, iwakken idiwenniyen imaynuten ur beddun ara yal tikkelt seg zeru.

OpenAI tessegza belli Takatut/Memory tezmer ad tɛiwen ChatGPT ad yissin ismenyifen, isenfaren d tilisa n useqdac iwakken idiwenniyen i d-iteddun ad bdun seg usatal i yellan yakan. Deg Yunyu 2026, OpenAI tessegza taneɣruft tamaynut n Memory i semma Dreaming, i d-yessuddusen ccfawat s wudem ara yeḥrez tatrart, akemmel d wazal n yisallen i useqdac.

Tamiḍrant-a tettak i ChatGPT tazmert ad yuɣal d allal n uxeddim ɣef wakud ɣezzifen, mačči d yiwen n udiwenni kan.

12. Isenfaṛen

Projects neɣ isenfaṛen d imeḍqan deg ChatGPT anda aseqdac yezmer ad yessemlil idiwenniyen, ifuyla, tinaḍin d usatal n yiwen n usenfar.

Amedya, amdan ixeddmen ɣef unadi ussnan yezmer ad yesnulfu Project i unadi-nni, ad yernu isemliyen, idiwenniyen d tinaḍin. ChatGPT yezmer ad yesseqdec asatal n usenfar iwakken ur ilaq ara useqdac ad d-yales yal tikkelt ayen akk i yellan yakan.

Projects sɛan azal ladɣa i leqdicat i yettkemmilen ɣef waṭas n wussan neɣ n wagguren: tira n udlis, anadi, asenfar n useɣẓan, aselmed neɣ axeddim n ugraw.

13. ChatGPT Work

Deg 2026, OpenAI tessemgarad gar Udiwenni/Chat d Uxeddim/Work.

Adiwenni iwulem ugar i yisteqsiyen, isegziyen, asnulfu n yimektayen, aseɣti n uḍris neɣ tiwuriwin iwezzlanen. Axeddim/Work, ma d netta, yettwabna i leqdicat imeqqranen i yeḥwaǧǧen waṭas n yimahilen, asatal d ugemmuḍ aneggaru i yezmer useqdac ad isenqed.

Tamiḍrant-a teskanay anerni n ChatGPT seg «steqsi-d, ad k-d-rreɣ» ɣer «efk-iyi-d asenfar, ad xedmeɣ fell-as armi d agemmuḍ».

D abeddel agejdan deg wamek i yezmer assaɣ gar umdan d tigzi taragmawant ad yettnerni.

14. ChatGPT d usihel

Asihel d yiwet seg taɣulin anda ChatGPT yesɛa aseqdec wessiɛen.

Yezmer ad yessegzi tangalt, ad yesseɣti tuccḍiwin, ad d-yefk imedyaten, ad iɛiwen deg usenfar n taneɣruft n useɣẓan, ad ixdem tasleḍt n tangalt, neɣ ad isenqed kra n wuguren n tɣellist.

Amsihel yezmer, amedya, ad yefk ugur s Rust, Python, TypeScript neɣ Java, syin ChatGPT ad yessegzi anida tella tuccḍa d wamek ara tettwaseɣti.

Akken ttnernin wallalen n OpenAI am Codex, assaɣ gar ChatGPT d usihel yettbeddil seg tallelt deg tira n tengalt ɣer yinagrawen i izemren ad xedmen ɣef usenfar s talɣa ugar tudmawant.

15. Aselmed d tussna

ChatGPT yezmer ad yettwaseqdec am umselmad ameẓyan i yellan yal tikkelt mi ara t-teḥwaǧeḍ.

Aseqdac yezmer ad yessuter asegzi s talɣa taḥerfit, syin ad yessuter lqem ugar n telqayt; yezmer ad yessuter imedyaten, iseqsiyen n usekyed, neɣ ad yessegzi yiwet n tmiḍrant s waṭas n tarrayin.

Deg tussna, ChatGPT yezmer ad iɛiwen deg tegzi n yimagraden ussnanen, tasleḍt n yisefka, tusnakt, asihel d usuddes n unadi.

Maca ilaq ad yettwaseqdec am wallal n tallelt, mačči am uɣbalu i ur yettceḍen ara. Deg temsal ussnanen ilaq asenqed n yɣbula, ladɣa mi ara yili ugemmuḍ yesɛa azal meqqren.

16. Tutlayin

Yiwen seg yibaɣuren imeqqranen n yimudam n tutlayt d tazmert ad xedmen s waṭas n tutlayin.

Tazmert-a tettak i ChatGPT azal meqqran i tutlayin ur nesɛi ara aṭas n wallalen n tetiknulujit. Yezmer ad yessegzi, ad yaru, ad isuqqel neɣ ad iɛiwen deg usnerni n ugbur s tutlayin yemgaraden.

Maca taswiɛt n umudam ur tettili ara kifkif deg yal tutlayt. Tutlayin i yesɛan isefka imeqqranen deg Internet d yisefka n uselmed zemrent ad sɛunt agemmuḍ igerrzen ugar ɣef tutlayin i yesɛan isefka drus. Ɣef waya, deg tutlayt am taqbaylit, aseqdec n yimawalen, iɣbula n tutlayt d useɣti n useqdac yezmer ad yesɛu azal ameqqran i tɣara n ugemmuḍ.

17. Tugniwin d usnulfu

ChatGPT yezmer daɣen ad yili d agrudem gar useqdac d yimudam n usnulfu n tugniwin.

Aseqdac yezmer ad yessegzi tugna i yebɣa s tutlayt tagamant: amḍiq, tafat, ini, amezruy, iselsa, tarrayt n unekcum n kamera d wayen-nniḍen. Anagraw yezmer syin ad d-isnulfu tugna almend n usegzi.

Yezmer daɣen ad yesseɣti tugna yellan: ad ibeddel aɣawas, ad yekkes neɣ ad yernu aferdis, ad ibeddel ini neɣ ad yerr tugna s tarrayt taẓurant yemgaraden.

S waya, tutlayt tuɣal d agrudem n usnulfu: deg umḍiq n useqdec n wallalen yellan sran aswir afellay n useqdec, amdan yezmer ad yessegzi kan ayen yebɣa.

18. Tameslayt s imesli

ChatGPT yezmer daɣen ad yettwaseqdec s ṣṣut.

Deg umḍiq n tira n uḍris, aseqdac yezmer ad yini asteqsi-s s yimi yerna ad yesel i tririt. Aya iqerreb ugar adiwenni akked tigzi taragmawant ɣer tarrayt n umeslay gar yimdanen.

Aseqdec s imesli yesɛa azal i uselmed n tutlayin, i udiwenni mi ur yezmir ara useqdac ad yaru, i tira n yimektayen s lemɣawla, neɣ i useqdec n ChatGPT mi yellan uxeddim-nniḍen deg ufus.

19. Ifuyla d tesleḍt n yisefka

ChatGPT yezmer ad iqbel isemliyen d yifuyla, syin ad ixdem fell-asen.

Amedya, yezmer ad yesleḍ PDF, ad d-yessufeɣ tiktiwin tigejdanin seg uneqqis, ad iqaren sin n yisemliyen, ad ixdem ɣef yisefka n tfelwit, neɣ ad yessegzi tugna.

Aya ibeddel tarrayt n useqdec-is: deg umḍiq n tira n yisefka meṛṛa deg "prompt", aseqdac yezmer ad yefk isemli yellan yakan syin ad yessuter ayen i yebɣa.

20. Taɣellist

Tazmert n ChatGPT tettawi-d daɣen uguren n tɣellist.

Anagraw n tigzi taragmawant yezmer ad yettwaseqdec i wayen yelhan, maca kra n yiseqdacen zemren ad ɛerḍen ad t-sqedcen i ukellex, tɣellist tasenselkamt, asnulfu n yisallen n lekdeb neɣ ayen-nniḍen i izemren ad d-yawi lexṣara.

Ɣef waya, OpenAI tessemras tarrayin n tɣellist i yebnan deg yimudam d yifarisen-is. ChatGPT yezmer ad yagi kra n yisutar neɣ ad ibeddel tarrayt n tririt ma yella usuter yezmer ad d-yawi lexṣara.

21. Aḥraz n yisefka d tudert tusligt

Aseqdec n ChatGPT yessufeɣ-d daɣen asteqsi ɣef tudert tusligt.

Aseqdac yezmer ad yefk isallen, ifuyla, tugniwin neɣ iḍrisen. Ɣef waya, ilaq ad yissin acu i d-yettazen ɣer unagraw, acu ara yettwaḥerzen, d wamek i izmer ad yessefrek ismenyifen-is n yisefka.

OpenAI tettak i yiseqdacen ismenyifen d wallalen i usefrek n yisefka d tɣellist n umiḍan. Deg useqdec n wallal am ChatGPT, imenzayen n tɣellist tasenselkamt mazal ttwaseqdacen: ur ilaq ara ad tazenḍ awalen uffiren, tasarut tusligt, neɣ isefka ur teḥwaǧeḍ ara ad ten-tefkḍ.

22. Aseqdec deg uxeddim

ChatGPT yekcem daɣen s waṭas ɣer umaḍal n uxeddim.

Yezmer ad iɛiwen deg tira n yimaylen, aneqqis, tasleḍt n yisefka, asuddes n udiwenni, anadi, asihel, aseggem n yisenfaren, asnulfu n yimektayen d waṭas n twuriwin-nniḍen.

OpenAI tenna deg 2026 belli aseqdec n ChatGPT yewweḍ ɣer uswir ameqqran deg umaḍal, yerna iseqdacen ttnernin s wakud anaw d umḍan n twuriwin i deg t-seqdacen.

Aya yessufeɣ-d asteqsi ameqqran ɣef uzekka n uxeddim: ChatGPT d yinagrawen am netta zemren ad beddlen kra n twuriwin, ad semɣiwlen tid yellan, yerna ad d-snulfun tiwuriwin timaynutin.

23. ChatGPT d usnulfu

ChatGPT yezmer ad yettwaseqdec deg tira n tullisin, isefra, isekla, isinariyuten, ismawen, tiktiwin n yifarisen d wayen-nniḍen.

Maca assaɣ gar tigzi taragmawant d usnulfuy n umdan yessufeɣ-d isteqsiyen imaynuten: d acu i d tamagit n umsawal? Amek ara nettwali azal n usnulfu mi yella anagraw yezmer ad d-isnulfu aḍris deg kra n tsanin? Amek ara ttwaḥerzen izerfan n yimyura d yineẓẓuren?

ChatGPT yezmer ad yili d allal n usnulfu, maca amdan i izemren ad yefren iswi, ad yessenqed agemmuḍ, ad ibeddel tikti, ad yefk tamuɣli-s d tmagit-is i uxeddim.

24. ChatGPT d tutlayin timeẓyanin

Yiwen seg yiseqdacen i yezmer ad yesɛu azal ameqqran deg uzekka d aseqdec n ChatGPT i tutlayin i yesɛan isefka drus.

Ma yella amudam yezmer ad yegzu tutlayt, yezmer ad iɛiwen deg usnulfu n ugbur, asuqqel, asegzi n tussna, tira n yisemliyen, aselmed n tutlayt d useɣti n yiḍrisen.

Maca dagi i d-yettban ugur n yisefka. Tutlayt ur nesɛi ara aṭas n yiḍrisen s tɣara deg yisefka n uselmed tezmer ad tesɛu tuccḍiwin ugar. I tutlayt am teqbaylit, imawalen, idlisen, isegzawalen, imagraden d useɣti n yiseqdacen zemren ad ɛiwnen s waṭas deg usemres iwatan n wallal.

S waya, ChatGPT yezmer ad yuɣal d allal n usnerni n ugbur s teqbaylit, maca tɣara n ugemmuḍ teḥwaǧǧ asenqed d useɣti sɣur yimdanen i yessnen tutlayt akken iwata.

25. Aseqdac amaḍlan

Seg ussufeɣ-is deg 2022, ChatGPT yenerna s lemɣawla deg waṭas n tmura d tutlayin.

Deg Yunyu 2026, OpenAI tesken-d, s yisefka-ines yettwasemlilen, belli useqdec n ChatGPT yettnerni deg waṭas n temnaḍin, yerna iseqdacen ttasen ad t-seqdacen ugar s wakud d deg waṭas n twuriwin.

Deg Ɣuct 2026, OpenAI tenna belli azal n yiwen n umelyar n yimdanen yal ddurt seqdacen ChatGPT i yisteqsiyen, anadi deg Web, asuddes, anadi ussnan, tallelt d twuriwin deg yal aḥric.

Anect-a yeskanay abeddel ameqqran i d-yeḍran deg kraḍ-neɣ kuẓ n yiseggasen kan: tigzi taragmawant n udiwenni teffeɣ seg tnaremt ɣer useqdec n yal ass.

27. D acu i ibeddel ChatGPT?

Azal n ChatGPT ur yeqqin ara kan ɣer tzemmar-is tiknulujiyin. Abeddel agejdan d agrudem.

Uqbel n yinagrawen am ChatGPT, aseqdec n uselkim yeḥwaǧǧ s umata ad tissineḍ amek ara tesqedceḍ yal asnas: anida ara ttekkiḍ, anwa taqeffalt ara ttekseḍ, anwa amur ara tɛemmreḍ.

ChatGPT yessekcem tarrayt-nniḍen: ini-d kan acu tebɣiḍ s tutlayt-ik.

S waya, tutlayt tagamant iman-is tuɣal d agrudem gar umdan d uselkim.

Aya yezmer ad yili yiwen seg yibeddilen imeqqranen n useqdec n yiselkimen seg mi d-nnulfan igrudam n tugna.

28. Seg ugrudem n udiwenni ɣer umeggi

Tazwara n ChatGPT tella tebna ɣef udiwenni: aseqdac yettazen asteqsi, anagraw yettarra-d.

Maca anerni n yimeggiyen n tigzi taragmawant (AI agents) ibeddel tamiḍrant-a. Anagraw yezmer ad yesseqdec allalen, ad inadi, ad ixdem ɣef yifuyla, ad yesseqdec isnasen neɣ ad ikemmel ddeqs n yimahilen iwakken ad yawi ɣer yiswi.

Deep Research, Codex d Work d imedyaten n tmuɣli-a: tigzi taragmawant ur tettqimi ara kan tettmeslay, maca tettnerni ɣer uxeddim ɣef twuri.

Ma yettkemmil unerni-a, assaɣ gar umdan d uselkim yezmer ad ibeddel ugar: amdan ad yefk iswi, anagraw ad yessefrek aḥric ameqqran n ubrid ara yawin ɣer yiswi-nni.

29. Tilisa n ChatGPT

Ɣas akken tizemmar-is ttwarnant s waṭas, ChatGPT mazal yesɛa tilisa.

Yezmer ad yecceḍ; yezmer ad yegzu asuter s wudem ur nelli d win i yebɣa useqdac; yezmer ad d-yefk aɣbalu ur iwatan; tamusni-s tezmer ad tili teqdem ma ur yesseqdec ara anadi; tazmert-is tezmer ad temgarad seg tutlayt ɣer tayeḍ; yerna agemmuḍ yezmer ad ibeddel almend n wamek i d-yettwafka usteqsi.

Ɣef waya, tazmert n useqdac ad yessenqed, ad yesteqsi, ad yesseɣti yerna ad yefrez gar wayen i d-yenna unagraw d tidet n yɣbula mazal d tagejdant.

Tigzi taragmawant ur tekkes ara azal n tegzi n umdan; deg useqdec igerrzen, tettak-as allal amaynut.

30. Azekka n ChatGPT

Azekka n ChatGPT yezmer ad yeqqen ɣer kra n yibeddilen igejdanen: imudam s tzemmar ugar, ccfawat i yettkemmilen s wakud, tizemmar n unadi d tifrat n wuguren, imeggiyen i izemren ad xedmen tiwuriwin ɣezzifen, akked wassaɣ ugar gar ChatGPT d yisnasen i yesseqdac umdan.

Abrid-a yeskanay abeddel seg umallal n udiwenni ɣer umallal n tigzi taragmawant i yezmer ad yili d amɛiwen n wakud ɣezzifen.